| |
Sardenia Tour 2007
Binago - Golfo Aranci - Cala Gonone - Macomer - Alghero - Santa Teresa - Golfo Aranci
9 - 14.11.2007
Dziyn ZERO
9.11.2007 Binago-Livorno-Golfo Aranci
Z poboczki żech wyjechoł o 10tej, cesta była w poho. W livorno fuczało, borcy Kitesurfowali, fajnie se na to dziwało. Wieczór było zima, wiater fuczoł eszcze wiyncy, se zdało, że se nie doczkóm aż tyn trajekt otewrzóm. Zebroł żech se spacak, zawołoł Walice, parziła z Helkami a synkami na Studencki, docela zawidzym....
Dziyń Piyrwszy
10.11.2007 Golfo Aranci – Olbia – San Teodoro – Siniscola – Orosei – Dorgali – Cala Gonone - 142 km, 20,1 km/h
Noc na trajekcie super, legnył żech se do spacaku za fotelami. Było fajnie cieplutko, żodnych ludzi. Trajekt jechoł na czas, tak żech 7:30 uż siedzioł na kole. Było azzuro, kolem 18 stopni, jechało se mi super tak, zech kolem jednej mioł najechane 100 km. Potym se ale dzwignył wiater, jak na potwore z południa, tak żech to mioł do gzychtu. Pohoda se wytraciła a tych 40 km żech se strasznie tropił. Cesta wiódła podel wybrzeża, żodnych aut, miasteczka taki śpiónce. Widać, że listopad nima a tych moc turystycznie zajimawy. Nejwiyncy se mi podobało Orosei, zastawił żech w takim małym barze, doł 2 piwka. Wieczór jak żech dojechoł, tak żech se pooblykoł wszystko co móm, nawarził gulaszowke. A je mi jasne, ze w nocy wymarznym.
 
 
Dziyń Drugi
11.11.2007 Cala Gonone – Dorgali – Oliena – Nuoro – Macomer – 91 km, 14,6 km/h
Tak ta noc nie stoła za nic. Zima, wiater, auta. Dokonce mie obudzili policajci. Teraz uż wiym, że „ TUTO BENE?” znaczy „wszystko ok?”. Rzeknył żech „SI”, tak odjechali. Eszcze staczyli pożyczyć ”Buena noce”. Obudził żech se o 7mej a hned żech wyjechoł. Od początku fuczoł straszny przeciwwiater, było to fakt na guwno. Do Nuore żech dojechoł kolem 1nej. Najechane jaksich 35 km. Katastrofa. Było mi jasne, że to bydzie boj. Nawarził żech polywke, zawołoł Walice a wyjechoł. Po rowinie na nejlechciejszy przewod, do kopca żech musioł koło ciść. No nie robiym se kozy. Do Macomer żech dojechoł na krew. Eszcze ku tymu zaczło padać a zaczło mie pichać w kolanie. Jak se sere, tak se sere. Zdecydowoł żech se, że se weznym pokój, zapłacił 30 Euro, ciepło sprcha, piwko, nareszcie cosi pozytywnego. Kolano żech namazoł Fastumgelym, móm nadzieje, ze to jutro bydzie ok. Ja a eszcze żech zapomnioł, że żech mioł defekt po ceście.
 
Dziyń Trzeci
12.11.2007 Macomer – Sindia – Bosa – Alghero
Macomer był super, wieczór żech na mieście doł pizze, vino de la casa – mezzo litre, kawke. Super. Rano śniodanko po italsku, grzanki z marmeladóm a 8mej żech wyjechoł. Było to troche z kopca, kolano nie bolało, o 11tej żech uż pił kawke w Bosa. Fajne miasteczko. Wyjechoł żech na ceste do Alghero, widoki super, dziwoki sardyński wybrzeże. Inómże mie zaczło zaś pichać w tym kolanie. Fukoł wiater, było to do kopca, no fakt żech chytnył krizowke, koło zech cisnył pieszko. A jak za mnóm ze zataczki wyjechoł autobus, tak zech na niego kiwnył. Borec se ani nie podziwoł a jechoł dali. Zdrowo mie to nasrało, nalóz żech na koło a szłapnył do tego. O 15tej zech uż widzioł Alghero. Doł żech na promenadzie 2 piwka, kupił winko w supraczu a naszoł nocleg na plaży przi zawrzitym barze. Doufóm, ze wszystko bydzie ok.
 
 
Dziyń Czworty
13.11.2007 Alghero – Porto Tores – Badesi – Vignola – Santa Teresa – 126 km, 18,6 km/h
Rano żech zrobił herbatke, pośniodoł a wyjechoł. Pogoda super, przestało fukać, temperatura tak 19 stopni. Do Porto Tores to nie było taki zajimawe, taki przemysłowe troche. Ale samo miasto było super. Doł żech kawke a jechoł dali. Jechało se super, bez wiatru, kolem morza, cieplutko, taki to miało być od początku. W Paduledda żech u taki pani wypytoł wode a zamiarym, że w Vignioli nóndym nocleg żech wyjechoł. Inómże Sardynia w listopadzie je jak po wymrziciu. Na jednóm stróne dobre – nima moc ludzi a aut. Na drugóm strone je tuto chiuso – wszystko zawrzite. Restauracje, bary, hotele, campingi. A Vignioli też. Na parkowiszczu przed zawrzitym campingym se mi fakt nie chciało spać. Zaszoł żech na bynzinke se psytać jeśli borec nie wiy o jakimsi agroturismmo albo prywacie. Odpowiedz była jasno – tuto chiuso. Wszystko ku.wa zawrzite. Żepry aż w St. Teresie. Onómże to je dalszych 17 km a uż se ćmiłó. Naroz borec wylecioł z tej swoji kukani a zacznył kiwać rynkami a..... zastawił autobus. Borec mie zebroł aż ku hotelu w St. Teresie. To był fuks. W hotelu żech też był sóm. JJ tyn listopad. Jutro mnie czako cca 70 km aż do Golfo Aranci. O 21 móm trajekt
 
Dziyń Piónty
14.11.2007 ST. Teresa – Palau – Arzehena – Golfo Aranci - 81km, 17,8 km/h
Rano śniodanko – chlyb z marmeladóm a cafe latte. Ledwo zech wyszoł z hotelu, omało mie nie odfukło. Naszczyńści fukało od wschodu – mi do pleców. Zaczło padać, tak żech inóm dowoł pozór, aby mi nie uklejzło koło na tym mokrym asfalcie. Wszystko dopadło dobrze, dojechoł żech do Golfo Aranci, zastawił w piyrszym barze, doł 4 lahwacze a przesunył se do portu. Tam żech zapłacił 9 Euro za przebukowani biletu a zakotwił w dalszym barze a popijoł piwko aż do odjazdu.
No Sardynia była fajn, była bez turystów, po ceście żech potkoł 1 turyste, jedno auto kampingowe, wszystki bary, hotele, kampingi pozawiyrane. Ale za to jak człowiek siednył do miejscowej gospody, tak móg w klidu pozorować jak se ci Sardowie żyjóm. Ceny też super, w jednej pizzerce żech se doł pizze, pół litra wina a kawke a zapłacił 7 Euro. No nie kup to. To były plusy. Minusy - pogoda.... wiater, wiater, wiater. W nocy było tak 5 stopni. Były momenty, że żech fakt lutowoł, że żech tu jechoł. Ale.... kóniec dobry – wszystko dobre. Prziszły roz trzeba jechać w połowie października.
 
|
 |
