| |
Binago – Chamonix – Verdon – Cassis – Genua
12.9 - 20.9.2007
Wszyscy se ciukali na czoło, że jadym sóm, że to je daleko... atd. Mnie to ale prziszło jako super napad a nejlepsze na tym je to, że se mi to aji podarziło zrealizować. Plan był taki: Binago – Chamonix – Verdon – Cassis – Genua.
Teraz troche statystyki:
- najechoł żech 1124,5 km
- czystego czasu w siodle 60 godz. 46 minut
- z przeciytnóm prędkoscióm 18,5 km/h
A teraz poszczególne dni:
Dziyń pierszy – 12.9. 2007 ujechane rowne 100 km z przeciytnóm 22,4 km/h
Trasa: Binago – Borgomanero – Romagnano - Biella
Ono to był tak naprowde dziyń zero. Siedzioł żech se tak przi komputerze na naszej poboczce w Binago, na polu azuro jak cyp. Tak se prawiym: na czakać, wyjedź uż dzisio (tzn. we strzode zamiast jak żech mioł naplanowane we czwortek). O 15tej żech uż siedzioł na kole, pożegnoł żech se z Piotrym a wyjechoł żech. Cało ta okolica kolem Varese, to je katastrofa. Same auta, korki, straszne. Jechoł żech przez Gazzade, Vergiate, Borgomanero, Romagnano. Problem był w tym, że to je taki wielki megalopolis ta okolica kolem jezior, jechoł żech praktycznie z jednego miateczka do drugigo, ani bych to nie poznoł, gdyby se nie zmiyniały tablice. Było mi jasne, że z noclegym to bydzie kruche. Nakóniec żech dojechoł aż do Bielli. Była uż ćma, w nogach 100 km. W jednej picerce mi poradzili hotel w centru, zapłacił żech 45 Euro, osprchowoł se a podziwoł se jak Taliani rozbili Ukrainców 2:1 w kwalifikacji na Euro.
Dziyń drugi – 13.9. 2007 ujechane 140 km z przeciyntnóm 17,6 km/h
Trasa: Biella – Donato – Andrate – Aosta – Courmayeur – Chamonix
Tego 13tego to zaczło ganc niewinnie. Wszystko szło po maśle. Wyjechoł żech o 7mej. Nogi nie bolały, tak żech ficzoł kierunek Ivrea. Przejechoł żech siodło w Donato – Andrate (854 m) a sjechoł żech na głównóm, kiero leci kolem rzeki Dory a autostrady kierunek Aosta. To żech se wtedy nie myśloł, że na tym bydym tak dobrze, że bych mógł ścignyć dojechać aż do Chamonix. Wszystko wypadało fajnie, okolica super, cesta mirnie do kopca. Inómże za Aostóm zacznył kopiec a jo uż tego zaczynoł mieć dość. Ostatnich 10 km do Coumayeur żech jechoł wiyncy jak godzine. Przijechoł żech do centrum a włosy se mi zjeżyły....ziścił żech, że ostatni autobus przes tunel do Chamonix odjechoł 15:30 (było 17). Tak żech se prawił, że zajadym na kole aż ku tunelu a skuszym chycić jakigosi stopa. 500 metrów za miastym se mi rozerwoł płaszcz a aji samozrzejmie dusza. Nie było mi trzi razy do śpiywu, nahradni płaszcz żech nimioł, dować dusze do tego rozerwanego by była głupota. Tak żech cisnył koło pieszo aż ku tunelu (cca 6 km) a świecie dziw se .... zastawili mi na stopa dwaj Francuzi z Oplym Corsa. Rozebroł żech oba kolca, posunył ty jejich taszki z zakupów w D&G a koło se z problemami ale wlazło. SUPER. Dojechali my do Chamu o 18:50 a do 7dmej mioł odewrzite sklep z kołami. SUPER. Kupił żech płaszcz (za cene opony na Waliczyne Clio) a dusze a eszcze mie borec z tego sklepu zawióz dodawkom do kempu. Wybroł żech se miejsce kolem takigo manika z kołym. Okazało se, że borec je z Nowej Zelandii a jeździ po Europie na kole. Żepry tam u nich je zima a na kole se moc jeździc nie do. Hmmm, też fajne. Swarził żech wode na polywke a prziszoł za mnóm borec z naprzeciwka, jeśli nie chcym szpagety, ze tego mawarzili za moc. Tak żech szoł. Poczynstowali mnie aji piwym, byli to Niymcy – lezcy. Asi borcy bo opowiadali jak by se nic nie robiło, ze wylyźli Eiger, Matterhorn, Freney, Jorassy, byli ajo na Fitz Royu. Opowiadali mi jak se tam potkali z Kurtym Albertym. Tak żech pojod, podziynkowol a szoł spac.
 
 
Dziyń trzeci – 14.9.2007 ujechane 126 km z przeciytnóm 19,6 km/h
Trasa: Chamonix – La Fayet – Megeve – Albertville – St. Jean
Rano żech zaspoł obudził żech se aż o 8mej. Wartko żech zrobił rokolicowóm zupe, pobalił a wyjechoł. Stawił żech se eszcze do Szamu na kawke (musiało być) a kupił mape. Wujechoł żech podle znaczki „tuties directiones” na kruhacz a zaczły problemy. Nimógł żech nónść ceste kierunek Albetville, bo po tej ich ce,scie szybkiego ruchu koła nimogóm jechać. Francuzi po angielski moc nini, tak tak to było dość o rynkach a nogach, nakómiec mie posłali po taki cesteczce, stoupoł żech jak cyp, nakóniec żech mioł całóm doline pod sebóm, potym żech sjechoł nadół.... a zaś stoupoł a zaś sjechoł.... PO 2,5 godzinach żech mioł najechane cosi przez 30 km a jak żech se podziwoł na mape – było to asi 1 cm, tak mnie chcioł cyp strzelić. Nakóniec żech dojechoł do miasteczka La Fayet, kaj zaczyno kopiec aż do Megeve. Sice żech nadowoł, ze dalszy kopiec, ale za to okolica była super, dómki w takim rakuskim stylu, no moc piekne. W Megeve mieli Mc’Donalds, tak żech se kupił zmrske a ficzoł z kopca kierunek Albertville. Jak żech se to pochwalowoł, że uż to dzisio móm inóm z kopca.... jeb. Naroz na cescie zakaz wjezdu a objazd doprawa. Nastoupoł żech tak 400 wyszkowych metrów.... No fakt parada. Potym sjezd a za pół godzinki żech uż se dowoł kawke w Albertville. Kapke żech spocznył a rzeknył se to skuszym nacióngnyć co jak nejbliży St. Michel. To je miasteczko kaj se odboczuje na Col du Galibier. Dojechoł żech 45 km przed, po czasie był parking z ławeczkami, tak żech zastawił, nawarził, napisoł smske Walice a z przekonanim, że żech je w cywilizowanym kraju a że mie fakt żodyn nie przepadnie a nie zbije żech szoł spać. Też żech kapke rozmyśloł jeśli tego Galibiera jutro zwladnym.
 
 
Dziyń czworty – 15.9.2007 ujechane 114 km z przeciyntnóm 14,8 km/h
Trasa: St. Jean – St. Michel – Col du Telegraphe – Valloire - Col du Galibier – Briancon
Noc nie stoła za moc, fórt żech se budził. No spać przi ceście a eszcze sóm – nic moc. O 7dmej żech uż był zbalóny, stawił żech se w nejbliższym miasteczku, kupił wode a gagete. Zrobił se zupke a walił kierunek St. Michel. Dolina nie byłanic moc, w St. Jean była jakosi huta czy co.... Za to St Michel uż było moc piekne miasteczko. Naszoł żech odboczke na tego mojigo Galibiera, doł żech se czokotatranke a wyjechoł. No co wóm bydym opowiadać...Fórt do kopca...Tropił żech se... Przedjyżdzali mnie 60latki... depka jak nic...Tyn 10 kilowy kufer co żech miołna zadku koła też nic moc...Ale jak uż to bywo, na to szpatne se wartko zapómni a zustanie inóm to dobre. P 13 km stoupanio przijyżdzom na Col du Telegraphe a za dalszych 4 km było miasteczko Valloire. Widać, że taki resort z wyższej półki, wypadało to tam fakt pieknie. Na siodło to uż było inom 18 km a jakisik 1500 m przewyszynio. Nijak żech se nie targoł, każdych 2-3 km żech doł minutowego resta. Słónko waliło, zymnie waliło też, tak żech se prawił, abych se nie przignoł jakisi zawał, że uż żech też nima nejmłodszy.....ale jak mnie przedjechali zaś jakisi dziadki... tak żech se rzeknył, że to troche przeganióm. Na siodle żech był 16:45, jechoł żech to skoro 7 godzin. No straszne. Ale je żech rod, żech to wubec dojechoł. Na wrchu żech se niechoł zrobić fotke, oblyk żech se fliske a czopke a pooomałuuu – tak jak mi kozoł Paveł Mikus, żech sjechoł do Briancon. 40 km sjezdu..... suuuperrr. Za miastym żech naszoł camp, cieplył dłóóógóm sprche, nawarził a wegecił przi herbatce. Usnył żech ani nie wiym jak.
 
 
 
 
Dziyń piónty - 16.9.2007 ujechane 109,5 km z przeciyntnóm 17,7 km/h
Trasa: Briancon – Savines le Lac – Seyne
Rano po tym Galibierowi żech se czuł kapke rozłómany, doł żech eszcze jednóm sprche, pojod zupke a wyjechoł. Cesta uciekała, było to mirnie z kopieczka a jechoł żech se takówedlejszóm kolem głownej, na kierej był moc wielki prowoz. W Savenes – Le – Lacżech odboczył na ceste, kiero wiedzie kolem jeziora Serre-Poncon (nejwiynksze przehradni jezioro w Europie). Nejprzód se wystoupało a potym jechało kolem. Było to moc piekne. Po objechaniu jeziora żech odboczył w strone Col St. Jean (1333m) a za nim żech sjechoł do miasteczka Seyne. To żech uż widzioł ciynżki mroki na górami a jak żech uwidził znaczke kempu, tak żech nie rozmyśloł a walił tam. Dobrze żech zrobił. Staczył żech inóm zrobić herbate a zaczła burzka. Je uż po sezonie, w kempie były taki dómki z terasami pprzikrytymi, tak żech se pod jedyn taki taras schowoł a był żech w suchu. W przenośni aji w realu.
 
 
Dziyń szósty – 17.9.2007 ujechane 127 km z przeciyntnóm 17,8 km/h
Trasa: Seyne – Col du Maure – Digne – Mezel – Estoublon – Puimoison – Moustiers – Col du Ayens – Point du Sublime
I choć żech se oblyk wszystko co żech mioł ze sebóm, w nocy żech se pore razy budził ze zimy, tyn Renków spacak je fakt fajny, malutki, lehutki, ale… godzi se tak przed krb w Lómnej. Rano żech se nawarził ciepłego czaju a wyjechoł. W Seynie prawie dziecka waliły do szkoły, na mnie czakoł 1346 m wysoki Col de Maure. Potym żech uż ficzoł z kopca, okolica była super, pieknie to uciekało. Uż se to pomału zaczło miynić, człowiek poznoł, ze wjyżdzo do Prowansji. W Digne żech chcioł nakupić, bo uż zasoby dochodzały, ale nie naszoł żech supracz, tak żech jechoł dali. W takim małym prowensalskim miasteczku Mezel mieli samoszke, tak żech kupiłjakisi zupy, wórszt, wajca (dostoł żech strasznóm chynć na wajeczyne), cebule, piwko. W dalszym miasteczku – Estoublon – żech kupił bagety a uż żech wiedzioł, z głód nie bydzie. Puimoisonżech odboczył kierunek Verdon. Przijechoł żech do Moustiers a cosi mi tu było powiedome. Potym żech se spómnioł, żemy tu byli z Walikóm a aji żech se spómnioł w kierym sklepie my kupowali taki saczki z lewandulóm. No a potym mie uż czakoł stoupak do 1032m Col du Ayes a objazd całego Verdonu. Super. Przejechoł żech go cały aż do Point du Sublime – tam żech se tez spómnioł, jak my tam przeszli kónsek z czelowkami z Walików a dzieckami. Asi 3 km dali żech to zabalił w kempie. Ja a zrobił żech se tóm wajeczyne.
 
 
 
Dziyń siódmy – 18.9.2007 ujechane 120,5 km z przeciyntnóm 20,6 km/h
Trasa: Point du Sublime w Verdon – Bergemon – Callas – Ste. Maxime
Noc stoła za gówno, kolem 11tej zaczło padać, tak żech se zbalił a legnył żech se do umywarek. W nocy zaś była kosa, tak żech se fórt budził, rano żech stanył niewyspany a zmyczóny. O co noc była blbo, tak dziyń se wydarził. Wyjechoł żech wczas rano, chwile żech jechoł dolinóm kolem rzeki Verdon a potym żech skryncił na południe. Okolica super – przepiekno Prowansja. Miasteczka przez kiere żech przejyżdzoł – np. Jabroh, Bergemon, Callas by każde mógło robić reklame na Prowansje. Kolem 2gi żech dojechoł do Ste Maxime nad morze. Nic żech nie rozmyśloł, zapnył koło o galandre a hubsnył tam...Lahoda hmmm....Powegecił żech na plaży do 17tej a wyjechoł żech dali kierunek Cannes. Wiater fukoł od zachodu, tak se fajnie jechało, ujechoł żech dalszych 30 km, naszoł camp, ciepnył sprche, pojod a zaszoł na 1go czepa, bo dowali Lige Mistrzów Marsylia – Besiktas. No ganc fajny dziyń. Jechoł żech kolem wybrzeza, je to piekny blaziniec. Sice uż nima sezon, ale ludzi je fórt kupa, głównie seniorów a studentów, kierym eszcze nie zaczła wyszka asi. Dzisio fest fukało a borec w St. Raphael skysurfowoł, lotoł do wrchu nad orzym tak 5-6 metrów. Zacznył drugi poloczas , tak żech se doł eszce jedyn kónsek. Skónczyło to 2:0 dlo Marsylli.
 
 
Dziyń ósmy – 19.9.2008 ujechane 146,7 km z przeciyntnóm 20,3 km/h
Trasa: Ste. Maxime – Cannes – Monte Catlo – San Remo
Rano żech wyjechoł kolem 8mej. Było to po rowince, wiater fukoł do pleców, no proste parada. Eszcze ku tymu te widoki a czestwywilgotny luft od morza. Przejyżdzoł żech przez Cannes, akórat przed teatrym nacióngali czyrwóny tepich. W Monte Carlu żech se zastawił a powegecił na plaży, napisoł widokówke a o 16:30 wyjechoł. Naplanowane żech mioł, że zajadym do San Rema a przed albo za nim nójdym camp. Niestety tyn w San Remu żech skrecznył, borec chioł niekrześcianskich 28 Euro. No to mu snad za miejsce na jednóm karimatke nie dóm. Inómże potymuż nic nie było, dojechoł żech omało do Vintemigli a uż za ćmoka żech naszoł camp. Babka mi mówiła, że go dzisio reopenyli, tak żech tu je sóm. Nie wadzi...Dziwoł żech se na mape, do Finale Ligure to móm cosi przez 60 km a do Janowa kolem 120km. Jeśli se dobrze pojedzie, tak to bych mógł naciongnyc aż tam skusić chycić jakisi wieczorny cug do Varese. Uwidzymy.
 
 
 
Dziyń dziewiónty – 20.9. 2007 ujechane 136 km z przeciyntnóm 20,1 km/h
Trasa: San Remo – Finale Ligure – Savona – Genua
Rano żech se obudził wczas, prawie wychodziło słóneczko, tak żech zrobił zatiszi z biwaku a 8mej żech wyjechoł. We Finale Ligure żech nimóg nie zajechać do Finalborga na kawke a zmrske, doł żech se lemon a pesce... tak samo jak my so to dowali na urlopie jak my tu byli z rodzinkóm. Moc żech se ale nie wstrzymywoł a jechoł dali. W Cogoleto żech to campnył na 2 godzinki na plaży a o 16tej żech wyjechoł dali. Genua uż zaczynała 25 km przed centrym a powiym wóm, żech se najod kupa strachu niż żech dojechoł na dworzec. Było to straszne. No ale nic, jaksi żech to przeżył. Na głównym dworcu były odewrzite 2 okiynka na sprzedój listków a frónta przed nimi jak przi odbawowaniu Jamba. Nakóniec żech tyn cug chycił ciesnie przed odjazdym, ani żech nie ścignył kupic nic na jedzyni. Ale nie wadzi, jeżech szczynśliwy, że żech to przeżył w zdrowiu. Pogoda wyszła wysmienito, koło aż na tyn prasknyty płaszcz wydrżało, na ceście nie była żodno poważno krizowka, aż mnie to dziwi jak to szło pieknie po maśle.
 
|
|
